Не кожны можа ўявiць сабе стос з... 59 мiльёнаў кнiг. А менавiта такiм агульным тыражом у Беларусi ў 1996 годзе выйшлi амаль 4 тысячы выданняў. Каля трэцi з iх прадстаўлены на традыцыйнай штогадовай выставе "Беларуская кнiга-96", што праходзiць у Нацыянальнай бiблiятэцы.

Цiкава, што на гэты раз вынiкi выдавецкай дзейнасцi за мiнулы год падводзяць не толькi адзiнаццаць дзяржаўных выдавецтваў, але i амаль паўтары тысячы недзяржаўных. I не выпадкова выстава адкрылася ў галоўнай бiблiятэцы краiны, якую штодня наведваюць дзве тысячы чытачоў. Бо бiблiятэкi сёння як нiколi маюць патрэбу ў папаўненнi сваiх фондаў. На гэта i скiраваны дзяржзаказ выдавецтвам, бо, паводле слоў дырэктара Нацыянальнай бiблiятэкi Галiны Алейнiк, спiс сацыяльна значных выданняў, у якi ўваходзiць школьная, энцыклапедычная, даведачная лiтаратура, змяншаецца.

"Беларуская кнiга-96" не толькi знаёмiць з навiнкамi, але i дае падставы радавацца за iх палiграфiчную якасць. Асобны стэнд прысвечаны выданням, што перамаглi на рэспублiканскiм конкурсе мастацтва кнiгi i ўдастоены дыпломаў.