Мiтынг у Мiнску, запланаваны Беларускiм народным фронтам на пл. Я. Коласа, прысвечаны 79-м угодкам Беларускай Народнай Рэспублiкi, пачаўся, вядома ж, з праспекта Скарыны. На пляцоўцы ля Чырвонага касцёла ў мiнулую нядзелю ў прызначаныя 11 гадзiн нiшто не абяцала вялiкага шэсця па праспекце. Каля касцёлу сабралася шмат вернiкаў, якiя ў руках трымалi зусiм не штандары, а галiнкi вербаў. Аднак праз лiчаныя хвiлiны, за некалькi метраў ад касцёла ля галоўпаштамта нiбыта нiадкуль на тратуарах паабапал праспекта з'явiлiся бел-чырвона-белыя сцягi, i шчыльныя калоны рушылi ў бок пл. Я. Коласа. Нехта, чый твар хаваўся пад жаночай панчохай, заўзята выбягаў на праезную частку i правакаваў перакрыць рух. Спроба "людзей у цывiльным" схапiць "панчоху" прама каля сцен КДБ не атрымалася. Беспаспяховымi былi i спробы ўдзельнiкаў шэсця выйсцi на праезную частку. Першая сур'ёзная бойка распачалася прама на скрыжаваннi праспекта i вул. Казлова. Мiлiцыя i АМАП неяк нечакана пачалi ўжываць дубiнкi, рэагуючы такiм чынам на незадаволенасць мiтынгантаў, якiх гэтак жа раптоўна пачалi затрымлiваць.

Хваляваннi дасягнулi свайго апагею. Мiлiцыя зганяла людзей з праезнай часткi, а тыя кiдалi ў яе тым, што трапляла пад рукi. Падаспелае падмацаванне АМАПа таксама не засталося без справы, i ўжо праз некалькi хвiлiн ля кавярнi "Паляўнiчы" пачалася самая сапраўдная бойка, толькi акрамя кулакоў у ход пайшло ўсё, што было пад рукой. Першая кроў "гарачай вясны-97" не прымусiла сябе доўга чакаць. Перапала i мiлiцэйскаму аператару -- ён стаў галоўным аб'ектам камякоў са снегу, а лабавое шкло яго машыны не вытрымала канкурэнцыi з кавалкам лёду.

Мiтынг на пл. Я. Коласа пачаўся з настрою "нiжэй за сярэдняга". Народ расцiраў выцятыя месцы i чысцiў рэшткамi снегу адзенне...